कामरगाव शिवारात भीषण अपघातात युवक गंभीर जखमी !

 

नगर – पुणे महामार्गावर कामरगाव शिवारात उभ्या असलेल्या मालट्रक वर आदळून नगर शहरातील युवक गंभीर जखमी झाल्याचे समजते. रस्त्यात उभ्या असलेल्या मालट्रक वर दुचाकी जोरात आदळून भीषण अपघात झाला. यात दुचाकी चालवणारा तरुण गंभीर जखमी झाला असून त्याच्यावर नगरमधील एका खाजगी रुग्णालयात उपचार सुरु आहेत. रविवारी रात्री ८ च्या सुमारास हा अपघात झाला आहे.

याबाबत मिळालेल्या माहितीनुसार,  नगर पुणे महामार्गावर कामरगाव शिवारात बंद पडलेल्या डी मॅक कंपनी समोर रविवारी रात्री ८ च्या सुमारास नगरकडे येणारा एक मालट्रक अचानक रस्त्यातच बंद पडला. रात्रीच्या अंधारात या मालट्रकचा अंदाज न आल्याने पुण्याहून नगर कडे मोटारसायकलवर येत असलेला प्रकाश रघुनाथ बडे (वय २३, रा.बोल्हेगाव) याची मोटारसायकल ट्रक ला पाठीमागून जोरात धडकली. त्यामुळे त्याचे डोके ट्रक वर आदळून तो गंभीर जखमी झाला.

या अपघाताची माहिती मिळताच कामरगाव येथील सामाजिक कार्यकर्ते व मृत्युंजय दूत म्हणून काम करणारे सिद्धांत आंधळे व त्यांचे सहकारी अमन शेख, नितीन लांडगे, संजय ठोकळ, प्रवीण चौधरी यांनी तातडीने घटनास्थळी धाव घेत जखमी तरुणाला रुग्णवाहिका बोलावून उपचारासाठी नगरला खाजगी रुग्णालयात पाठविले. त्यानंतर अपघात ग्रस्त वाहने बाजूला करत वाहतूक सुरळीत करण्यास मदत केली. सिद्धांत आंधळे व त्यांचे सहकारी यांनी दाखविलेल्या तत्परतेमुळे या तरुणाला वेळेत उपचार मिळू शकले आहेत.